Ғылыми мақалада өзге тілді мектептерде қазақ тілі мен әдебиетін оқытудағы білім мазмұнындағы әдіс-тәсілдерге зерттеу жүргізілген. Қазақ әдебиетінің білім мазмұнының негізгі құрамдас бөлігі болып саналатын қазақ әңгімелері арқылы оқушылардың дүниетанымын, өмірге деген көзқарасын қалыптастырудың, өзін-өзі жүзеге асыруының құралы ретінде пайдаланудың жолдары айқындалған.

Орыс мектептерінде қазақ әдебиеті пәнін оқытудың мақсаты – өзге ұлт өкілдеріне қазақ халқының әдеби бай мұрасы мен тарихын таныстыру болып саналады. Әдебиет пәні – өзге тілде сөйлейтін оқушының бойында елге деген құрметті оятуға септігін тигізеді. Сонымен қоса, елді, айналасындағыларды тереңірек білуге, халықтың тұрмыс-тіршілігімен жақын тануға ықпал етеді. Әр мұғалім қазақ тілі мен әдебиеті сабақтарында тіл дамыту жұмыстарын шығармашылық мәнде жүргізіп, дұрыс ұйымдастыра білсе, ол оқушының күнделікті өмірдегі құбылысты жан-жақты түсіне білуіне, үйренуіне, білген нәрселерін ауызекі сөздерінде қолдана білуіне жағдай жасайды.