Бұл мақалада қазақ тіліндегі антропонимдердің сөзжасамдық тәсілдері кеңірек қарастырылады. Синтетикалық сөзжасамдық тәсіл арқылы жасалған кісі есімдерінің де мағынасы мен тұлғалық жағы күрделі болады. Мұнда тірек сыңар лексикалық мағыналы себепші негіз болады да, жұрнақ өзінің мағынасын қосып отырады. Жұрнақтың сөзжасамдық мағынасы арқылы жаңа екіншілік мағына жасалады.

Барлық синтетика-семантикалық сөзжасамдық тәсіл арқылы жасалған туынды сөздердің мағыналық құрылымының қалыптасуында себепші негіздің мағынасының маңызды рөл атқаратыны туралы профессор А.Б. Салқынбай өзінің “Қазақ тілінің сөзжасамы” деген еңбегінде толық жазады. Автор себепші негіз мағынасы туынды сөздің мағынасымен салыстырғанда кеңірек әрі ауқымды екенін жазады. Осы теорияны негізге алсақ, кісі есімдерінің синтетикалық тәсілінде де осы тұжырымның орындалатынына көз жеткізу қиын емес.