Абай мен Шәкәрім шығармашылығы – сан қырынан қарап, тереңдікпен үңілуді қажет ететін ерекше құбылыс. Мақалада екі ақын туындыларындағы ар ілімінің тоғысуы, әдеби сабақтастық пен рухани тұтастық мәселесі Шәкәрімнің "Еңлік-Кебек" поэмасына талдау жасау арқылы сараланған. Автор "Еңлік-Кебек" сюжетіне арналған шығармалар -  "Дала уалаятының газетінде" жарияланған "Қазақтардың естерінен кетпей жүрген бір сөз" және "Қазақ турасынан хикая" атты екі әңгіме мен Мағауияның, Шәкәрімнің "Еңлік-Кебек" поэмалары және М. Әуезовтің “Еңлік-Кебек” пьесасын талдау барысында әр суреткердің шығармашылық ұстанымы, идеялық-эстетикалық талабы, ол өмір сүрген дәуір мен ортаның талғамы және болған оқиғаға автордың өз үкімімен қатар қаламгерлік қарымын да танытады. Зерттеу барысында осы нұсқалардың барлығы Абай дәстүрі, Абайдың ақындық айналасы тұрғысынан қарастырылған.