Қазіргі таңда концепт ұғымын зерттеу тек тіл білімі саласында ғана емес, сондай-ақ жалпы дүниетанымдық тұрғыда да өзекті мәселеге айналып отыр. Концепт ой елегінде, сезімдік таным жүйесінде, ішкі бейне әлемінде қалыптасады. Мақалада қазақ тіліндегі Ар концептісінің репрезенттеуші лексемасының мағынасы сараланады және оның ұлттық ­мәдени ерекшеліктері анықталады. Ар концепті адамның күнделікті өмірінде, оның басқа адамдармен, қоғам мүшелерімен араласуында адам өмірінің негізгі лингвистикалық аспектісі болып табылады. Мақалада Ар концепті адамгершілік, ұят, намыс, иман, адалдық, абырой, т.б. тұжырымдармен өзара байланысы көрсетілген. Ар концептісінің интерпретациялық зерттеу материалдары ретінде жазушы Т.Ахметжанның шығармалар жинағы таңдалып алынды. Жалпы қазақ танымында Ар концептісі арқылы адамның өмірлік болмысын айқындауға болады.