Мақалада ақпараттық қоғам жағдайында туындайтын қазақстандық телевизияның өзекті мәселелері мен қызметінің құқықтық аспектілері қаралған. Әлеуметтік жауапкершілік жүктелген телеарналардың қызметін бақылау мен болжау тетіктері, оның қоғамды демократиялық жаңғыртудағы рөлі сарапталады. Ақпараттық қоғамдарда хабар таратуды ұйымдастырудың құқықтық аспектілерін жан-жақты талдаған авторлар жаңа әлеуметтік ортадағы телевизияның қызметі мен рөлінің маңыздылығын да жүйелеп сараптауға басымдық берген.

Мақалада қазіргі медиа саладағы қарым-қатынастар мен контенті басқарудың жаңа формалары азаматтық белсенділікті арттырып, қоғамның саяси санасының өсуіне ықпал ететіні атап көрсетілген. Бұның өзі әлеуметтік сегментті өзгерту мен оған ықпал етудің тиімді тәсіліне айналуда. Аудиторияның бұрынғы енжар топтарының коммуникативтік процестің белсенді мүшелері қатарына ауысуы мемлекет пен қоғамның алдына мүлдем басқа міндеттер қоюда.

Телевизия мен саяси институттар арасындағы қатынастардың болжамды парадигмалары және ақпараттық қоғамда телеарналар қызметіне қоғамдық бақылау тетіктерін қалыптастыру қағидаларының маңызы тұжырымдалған.