Көшпелі өмірдің көсемі болған халқымыз қашанда төрт түлік мал ішінде жылқыны төресі етіп, ерекше бағалаған. Оны халықтық салт-дәстүріміздің, дүниетанымымыздың тамаша көрінісі ретінде балап, адам тәрбиесінде де алар орнын көрсетіп, өзіне тән ерекшеліктерін айқындай білген.Мақалада әлем халықтары туындыларында наным-сенімдеріне сай екі әлемді байланыстырған образы, болмысындағы қасиеті, адамдар өмірінде алған орны жөнінде айтылған. Сонымен бірге, ертегілік сюжетке құрылған қазақ батырлық жырлары үлгілерінде де және батырлық эпостарында да бейнесі дараланып, жиі орын алатын сарындар туралы да мәліметтер келтірілген. Дала төсін күңіренте шауып,елін қорғаған қаһармандардың мақсатқа жетер жолдағы сенімді серігіне айналған сәйгүліктердің тамаша тұлғасы, қиын қыстау кезеңдегі батырдың ауыртпалығымен ортақтаса білуі, оған халық құрметімен ықыласы бейнелі байламдар арқылы жеткізілген.