Әлемдік тәжірибеде кез келген тілді меңгеруде сөйлесу әрекетінің ең негізгі бес дағдысын меңгерту және дамыту арқылы нәтижеге жетуге болатыны дәлелденіп отыр. Ал қазақ тілінде бұл мәселе соңғы жылдарда қолға алынып, енді дамып келе жатыр. «Оқушылардың айтылым дағдысын дамытудың маңызы» мақаласы қазіргі қазақ тілін оқыту әдістемесіндегі ең өзекті мәселелердің бірі – оқушылардың дұрыс сөйлеу қабілетін дамытудың маңызына арналып отыр. Мақалада қазақ ғалымдарының да дұрыс сөйлей білу мәдениетіне қатысты айтқан ой-тұжырымдары берілген. Оқушылардың айтылым дағдысын дамытудың мақсаттары мен міндеттері, артықшылықтары мен тиімді тұстары, 5-7 сыныптар мен 8-11 сынып оқушыларында осы дағдыны дамытқанда ескерілуі керек жағдайлар мен сабақ барысында қолдануға болатын әдіс-тәсілдердің бірнеше түрлері ұсынылып отыр. Қазіргі жаһандану заманында оқушының орфоэпиялық заңдылықтарды сақтап сөйлеуінің мәні туралы сөз қозғалады.