Жаһандану заманында тілдердің алуантүрлілігін сақтап қалу мәселесі жиі талқылануда. Өйткені тіл өзінің сыртқы және мазмұндық ерекшелігімен этностың ойлау жүйесін, таным-түсінігін, тұрмыс-тіршілігі мен мәдени өзіндік сипатын бейнелейді. Осы орайда, қолданыстағы тілдер тізіміндегі қазақ тілінің орны мен қолданылу аясын анықтаудың маңыздылығы артты. Өйткені еліміздегі ағымдағы тілдік жағдаятқа талдау жасап, қазақ тілінің бүгінгі қолданыс аясын анықтау Қазақстандағы тіл саясатының басым бағыттарын байыптауға, мемлекеттік тілдің беделін көтеруге бағытталған әлеуметтік, мәдени, саяси іс-шараларды уақытылы әрі орынды жоспарлауға мүмкіндік береді.Мақалада әлемдіктәжірибедегі тілдің өміршеңдігін анықтау мен деңгейлерге топтастыру бойынша зерттеулерқарастырылады. Қазақ тілінің қазіргі жағдайына талдау жүргізіліп, оның өмір сүру көрсеткіштерін жақсартуға бағытталған ұсыныстар жасалады.