Бұл мақалада қазіргі қазақ телевизиясының прагмастилистикалық ерекшеліктері қарастырылады. Қазақ телевизиясындағы ана тіліміздің бүгіні мен болашағын бағдарлау тіл мамандарының міндеті болып саналады. Прагмастилистика саласы когнитивті лингвистика, психолингвистика, сөз мәдениеті, лингвомәдениеттану мәселелерін де басшылыққа алады, осы салалармен байланысты тіл көрінісін анықтайды.Қазақ телевизиясы прагмастилистикасының өзекті мәселеге айналуына бағдарламалардың, телехабарлардың публицистикалық стильден ауызекі стильге ойысып жатқаны себеп болып отыр. Телебағдарламалардың рейтингісінің төмендеуі, теледидар көретін жұртшылықтың азаю себебі сөз қолданысының, сөздің әсер етуші күшінің төмендеп бара жатқандығынан деп білеміз. Бүгінгі қазақ телевизиясындағы “Дара жол”, “Мәселе”, “Біздің назарда” сынды әлеуметтік-сараптамалық бағдарламалар, “Ережесіз әңгіме”, атты телесұхбат бағдарламалар мақалаға материал ретінде алынды. Ток-шоулардың прагмастилистикасын зерттеу де бүгінгі күннің келелі мәселесіне айналып отыр. Осы мақсатқа сәйкес“Қалаулым”, “Өз ойым”, “Астарлы ақиқат” бағдарламалары тіліне прагмастилистикалық талдау жасалды.