Қазақ тілін оқу барысында корпустық лингвистика саласына көп көңіл бөліп, оның әлемдік деңгейдегі теориялық және практикалық аспектілерін зерттеу қажет. Ғылыми журналдардың арнайы басылымдарында сондай-ақ бүкіл әлем бойынша мәтін корпустарын құруға және олардың жұмысына қатысты жалпы және нақты мәселелер бойынша мақалалар жарияланады. Алайда, қазақ тіл білімі үшін корпустық лингвистикамен байланысты көптеген мәселелерді арнайы зерттеу қажет. Ол: корпустық лингвистиканы және оның негізгі ұғымдарын анықтауды, тіл білімі құрылымындағы корпустық лингвистиканың орнын, әдістер мен тәсілдерді және т. б. қамтиды. Жоғарыда аталған корпустық лингвистиканың теориялық және практикалық аспектілері компьютерлік корпус негізінде қазақ тіліндегі мәтіндердің деректер базасын жасау кезінде назарға алынуы тиіс. Егер корпустық лингвистика қазақ тіл білімінің ерекше бөлімі ретінде қалыптасса, ол қазақ тілін пайдаланушы әрі қазақ тілінде зерттеулермен айналысатын көптеген мамандарға үлкен көлемді тәжірибелік материалдарды пайдалануға, қажетті тілдік деректерді табуға және тиісті өзгерістер енгізуге мүмкіндік береді. Осының барлығы қазақ тілін зерттеудің шынайылығына эмпирикалық көзқарасқа және ғылым саласындағы ең маңызды тілдік материалдарды енгізуге ықпал етеді.