Мақалада қазіргі таңдағы өте өзекті жанрлардың бірі - эссе туралы, соның ішінде талдамалы эссе мәселесі көтеріледі. Талдамалы эссе - мазмұны жағынан терең пайым мен талдауға, бұлтартпас айғақтар мен дәлелдерге, мысалдарға құрылатын эссе түрі. Оны тілі мен стилистикасы жағынан ғана емес, композициясы, логикасы жағынан талдау нысанына алу кез келген оқырманның білімін кеңейтіп қана қоймай, ойлау мәнері мен машығын, дәлелдеу өнерін игеруге мүмкіндік береді. Талдамалы эсселердің ұғымдық аппараты мен дәлелдеу аппараты оны дидактикалық мақсатта оқу үдерісінде қолдану әлеуетін арттыра түседі. Оқырманды ұғым, пайымдау, ойқорытынды сияқты ойлау формаларына, диалектикалық ойлаудың заңдарына үйретеді. Сол себепті де талдамалы эсселердің дидактикалық әлеуетін оқу үдерісінде, парасатты оқырман тәрбиелеуде дидактикалық маңызы ерекше болып табылады